സ്‌കോഡ ഒക്ടാവിയയുടെ പരിഷ്‌കരിച്ച പതിപ്പ് ഈ 13ന് വിൽപ്പനയ്ക്കെത്തും

ചെക്ക് വാഹന നിർമാതാക്കളായ സ്‌കോഡയുടെ ‘ഒക്ടാവിയ’ യുടെ പരിഷ്‌കരിച്ച പതിപ്പ് ഈ 13ന് വിൽപ്പനയ്ക്കെത്തും. 2013ൽ വിപണിയിലെത്തിയ മൂന്നാം തലമുറ ‘ഒക്ടാവിയ’യിൽ ചില്ലറ പരിഷ്‌കാരങ്ങൾ വരുത്തിയാണു സ്‌കോഡ പുതിയ കാർ അവതരിപ്പിക്കുന്നത്.

പരിഷ്‌കരിച്ച ‘ഒക്ടാവിയ’യ്ക്കുള്ള ബുക്കിംങുകൾ രാജ്യത്തെ സ്‌കോഡ ഡീലർഷിപ്പുകൾ സ്വീകരിച്ചു തുടങ്ങി. ജനപ്രീതിയാർജിച്ച ‘എം ക്യു ബി’ പ്ലാറ്റ്ഫോം അടിത്തറയാക്കിയാണു സ്‌കോഡ ‘2017 ഒക്ടാവിയ’ സാക്ഷാത്കരിച്ചിരിക്കുന്നത്.

‘ക്വാഡ്ര എൽഇഡി’ ഹെഡ്ലൈറ്റെന്നു സ്‌കോഡ വിളിക്കുന്ന വിഭജിച്ച ഹെഡ്ലാംപ് ക്ലസ്റ്ററാണ് പുതിയ ‘ഒക്ടാവിയ’യിലെ പ്രധാന സവിശേഷത. ലോ, ഹൈ ബീമുകൾ വിഭജിക്കുന്നതടക്കം നാലു കംപാർട്മെന്റായാണ് ഈ ഹെഡ്ലൈറ്റിന്റെ രൂപകൽപ്പന. കൂടാതെ ബംപറിലുള്ള എൽഇഡി ഡേടൈം റണ്ണിങ് ലാംപും ഫോഗ് ലാംപും പുതുമയാണ്. പിന്നിലെ ടെയിൽ ലാംപ് എൽഇഡി യൂണിറ്റാക്കിയതിനു പുറമെ പിൻ ബംപറും പരിഷ്‌കരിച്ചിട്ടുണ്ട്.

അതേസമയം അകത്തളത്തിലെ ഡിസൈനിൽ കാര്യമായ മാറ്റമൊന്നും സ്‌കോഡ വരുത്തിയിട്ടില്ല. ബ്ലാക്ക് ബീജ് ഇരട്ട വർണ ലേ ഔട്ടിനൊപ്പം പുതിയ മൂന്നു സ്പോക്ക്, മൾട്ടി ഫംക്ഷനൽ സ്റ്റീയറിങ് വീലും കാറിലുണ്ട്. പഴയ ‘ഒക്ടാവിയ’യിൽ നാലു സ്പോക്ക് സ്റ്റീയറിങ് വീലായിരുന്നു. ആപ്പിൾ കാർ പ്ലേ, ആൻഡ്രോയ്ഡ് ഓട്ടോ, മിറർ ലിങ്ക് എന്നിവയ്ക്കൊപ്പം പിൻസീറ്റിൽ നിന്നു നിയന്ത്രിക്കാൻ കഴിയുന്ന ‘ബോസ് കണക്ട്’ ആപ്ലിക്കേഷൻ സഹിതമുള്ള ഒൻപത് ഇഞ്ച് ഇൻഫൊടെയ്ൻമെന്റ് ടച് സ്‌ക്രീനും കാറിലുണ്ട്.

സാങ്കേതിക വിഭാഗത്തിൽ മാറ്റമൊന്നുമില്ലാതെയാണ് ‘2017 സ്‌കോഡ ഒക്ടാവിയ’യുടെ വരവ്. 1.8 ടി എസ് ഐ, 1.4 ടി എസ് ഐ പെട്രോൾ, 2.0 ടി ഡി ഐ ഡീസൽ എൻജിനുകളാണു കാറിനു കരുത്തേകുക. ശേഷിയേറിയ പെട്രോൾ എൻജിൻ പരമാവധി 178 ബിഎച്ച്പി കരുത്തും ശേഷി കുറഞ്ഞ എൻജിൻ 147 ബിഎച്ച്പി കരുത്തുമാണ് സൃഷ്ടിക്കുക. ഡീസൽ എൻജിനാവട്ടെ 147 ബിഎച്ച്പി വരെ കരുത്ത് സൃഷ്ടിക്കാനാവും. 1.8 ടിഎസ്എ എൻജിനൊപ്പം ഏഴു സ്പീഡ് ഡിഎസ്ജിയും 1.4 ടി എസ് ഐക്കൊപ്പം ആറു സ്പീഡ് മാനുവൽ ഗീയർബോക്സുമാണു ട്രാൻസ്മിഷൻ. ഡീസലിനു കൂട്ടാവുന്നത് ആറു സ്പീഡ് ഡി എസ് ജി ഗീയർബോക്സാണ്. ഇന്ത്യയിൽ ഹ്യുണ്ട ായ് ‘എലാൻട്ര’, ടൊയോട്ട ‘കൊറോള ഓൾട്ടിസ്’, ഫോക്സ്വാഗൺ’ജെറ്റ’ തുടങ്ങിയവയോടാണ് ‘ഒക്ടാവിയ’ മത്സരിക്കുക.

Social Icons Share on Facebook Social Icons Share on Google +